Өскемендегі жаңартылған аллеяда ерекше әткеншек орнатылады
Облыс орталығында ең ұзын аллеялардың бірінде жұмыс жалғасуда. Ол Астана, Потанин және Қашаубаев (бұрынғы Дзержинский көшесі) көшелерін біріктіреді. Ұзақ уақыт бойы бұл жер қаңырап бос тұрған болатын, ал жазда қалың бұталар арасынан өту мүмкін емес-тін. Сонымен қатар, балалар да осы жолмен жиі жүреді: жақын жерде бірнеше мектеп, балабақша бар.
Нысанда жұмыс істейтін мердігерлер аллеяда қандай өзгерістер болатынын айтты.
— Ең соңынан мектеп тұрған жерде беседка орнатамыз. Сол жердегі жарықтандыруды толығымен ауыстырамыз. Барлық жолдарды жаңартамыз, — деді мердігер. — Сондай-ақ, аллеяда воркаут алаңы, ойын алаңы, ерекше екі орындық қанатты әткеншек болады. 30 тамызға дейін барлық жұмыстарды аяқтаймыз.
Айтпақшы, жақын жерде жөндеуді қажет ететін мектеп қоршаулары бар. Нысанда болған Өскемен қаласының әкімі Жақсылық Омар өз қарамағындағыларға бұл мәселені білім беру саласының шенеуніктерімен пысықтауды тапсырды.
— Мектеп директорларымен сөйлесу керек, қоршаулар кем дегенде жаңартылуы керек. Бұл жерде әдемі аллея болады, ал қоршаулар барлық көріністі бұзып тұр. Өкінішке қарай, жөндеу жұмыстарын жүргізуге құқығымыз жоқ, өйткені нысандар облыстық бюджеттен қаржыландырылады, — деп түсіндірді әкім.
— Сіз жақын маңдағы үйлердің тұрғындары үшін жақсы іс жасап жатырсыз, — деді әкімге жергілікті тұрғын Мария Енкенова. — Жалпы, қала бойынша жер-жерде абаттандыру жүріп жатыр. Қала құлпырып келеді!
