Өскеменде жолдардағы жағдай туралы ақпаратты LED экрандарда орналастыру жоспарлануда

Экрандарды облыс орталығынан шығатын жерлерде орнату ұсынылады.

9 қарашада Өскемен қаласының әкімі Жақсылық Омардың қабылдауына кәсіпкер Марат Заркомбаев келді. Ер адам жүргізушілерге ауа-райына байланысты жолдардың жабылуы туралы уақтылы хабарлау үшін қаладан шығаберіс жерлерге LED экрандар орнатуды ұсынды.

    — Бұл туралы ескертулер телефонға тым кеш келеді, — деп түсіндірді Марат Викторович. — Дисплейде ешқандай жарнама болмайды, тек жолдағы жағдай туралы ақпарат болады. Сондай-ақ жыпылықтайтын триггерлер жасауға болады. Олар жанған кезде жүргізуші баяулап, экранға назар аудару керек екенін түсінеді.

Кәсіпкердің бағалауы бойынша, бір электрондық таблоның құны оны орнатуды және пайдалануға беруді қоса есептегенде, шамамен 45 миллион теңгені құрайды.

   — Қазірдің өзінде мұндай жобалар көптеген елдерде іске асырылды және олар жолдардағы қауіпсіздікті күшейтуге үлкен көмек көрсетуде, — деп сөзін толықтырды Марат Викторович.

Өскемен қаласының әкімі бұл идеяны келешегі бар деп тапты.

    — Сіз бұл экрандарды ақшаңызға қоя аласыз, ал біз сізге экрандарда көрсеткіміз келетін ақпаратты орналастыру үшін төлейтін боламыз. Мысалы, жолдардың жабылуы немесе тас жолдардағы апаттар туралы, — деді қала басшысы келушіге.

Жақсылық Омар былай деп сөзін жалғады: егер кәсіпкердің электрондық табло орнатуға қаражаты болмаса, бюджет қаражаты есебінен идеяны іске асыру мәселесін пысықтауға болады. Ол үшін әлеуетті пайда мен болжамды шығындарды бағалап, содан кейін конкурстық негізде мердігерді анықтау қажет болады.

  — Онда біз барлық шығаберіс жерлерге бірден таблоларды орнатпай, алдымен, екі экраннан бастайық, - деді Жақсылық Омар.